شماری از پناهجویان افغان در تاجیکستان می‌گویند که از ترس دستگیری، با مشکلات و نگرانی‌های شدید روبه‌رو اند.
تعدادی از این افغان‌ها به رادیو آزادی گفته‌اند که با وصف داشتن اسناد قانونی اقامت، از سوی نیروهای امنیتی تاجیکستان مورد اذیت و آزار قرار گرفته و در صورت نپرداختن پول، به اخراج تهدید می‌شوند.
با آن‌که مقام‌های تاجیکستان گزارش‌ها در مورد آزار و دستگیری افغان‌ها را رد می‌کنند، اما کمیشنری عالی سازمان ملل متحد در امور پناهندگان گفته است که تا ماه اکتوبر سال ۲۰۲۶ حدود یک‌هزار و ۵۰۰ افغان از تاجیکستان اخراج شده‌اند.
مقام‌های تاجیکستان در ماه می گذشته، حداقل ۲۵۰ افغان را اخراج کردند و این اقدام پس از آن صورت گرفت که یک افغان به قتل یک زن تاجیک در ولایت سغد متهم شد.